Menam 4—0: Untung Saja Ada Pak M.u.
Lit pengalamen berngi enda si kuakap banci nambahi informasi man banta. Berngi ndai aku ndahi perjabun merga Bangun ras beru Siregar. Tangtangna seh ku gedung resepsi nungkun aku man cateringna:
“Kai ban kena gulenta?” “Gulen Karo, rendang, lemang-lemang, cincang bohan. Tapi lit ka nge saung-saung,” nina nande si erdakan e.
Kenca undangen mulai man, terbegi sora kalak rende. Sengget kel aku sebab lagu e lagu Tapanuli. Ningku man sebelahku kalak Karo ka:
“Uga nge maka dua telu kalak kenca teman-temanta bas Toba nari tapi mis begi sorana?”
Cirem saja teman i sebelahku. Ningku ka man keluarga si erkerja e:
“Uga nge maka la lit lagu Karo?" ningku.
Agak mamang tena mbegi penungkunenku. Kenca rende ka anak kitik si bapana kalak Tapanuli tapi nandena kalak Karo. Laguna lagu Indonesia ras terjemahenna lagu Tapanuli.
“Uga nge?” ningku ka man teman si ndeher ije. Cirem saja ka ia.
“Entah enggo nge aku si salah enda,” ateku bas ukur. Kenca, terus ka lagu si peteluken. Terus ka sipeempatken.
“Enggo 4—0,” ningku man piga-piga teman. Tapi kerina tenang-tenang saja.
Minter aku cinder. Kujumpai merga Tarigan.
“Hen... Ini tolong kam nyanyi lagu Karo dulu. Aku lanai kuakap sikap enggo 4—0 e,” ningku.
“Ok, Bang,” nina ngaloi. Aku enggom lanai mbue ngarap. Sebab sebelumna pe enggo ka nge lit kusuruh, tapi la begi-begi sorana.
Rempet terbegi sora:
“O Taneh Karo Simalem ...”.
"Enggo 4—1," ningku ka man temanku kundul. Tawa saja ia. Kenca reh ka dua kalak nemani Tarigan mergana e ngendeken lagu sipeduaken. Aminna pe jelma lanai enterem, tapi dungna seh 7 lagu. Reh Tarigan ndai ndahi aku,
“Bagaimana, abang sudah senang?” nina.
“Ya, sudah 7—4 untuk Karo,” ningku. Tawa ia.
Bagem kecibal geluhta. Si beluh rende e pe mbelin kel melana. Emaka payo ka nge lit bagi Pak M.U. Ginting si ‘mekeng’ ngendéken Karo e. Adi lang... seh dung kerja e, labo terbegi sora kalak Karo.
Bujur sekadar berbagi pengalaman saja.