Beranda / Puisi: Bena Taneh Tampuk Puisi: Bena Taneh Tampuk Budaya · 23 Desember 2014 Oleh: Kempu Raja Lambing Tatapndu pagi kahe kolu Ja idahndu taneh mehuli bagi Taneh Karo Delengna meratah launa meciho Jelmana mehamat kenjahe ku kenjulu Lit nge tersungkun bas pusuhndu, ija kuta kemulihendu? Adi perdalan mambur enggo seh ku kepar lau… Lit nge ndia terkusik ku tendi peratenndu? Gelah nolih nungkir lah gia ku kuta kemulihendu… Adi sik-sik terus ku batang kesahta, Taneh Karo me asal geluhta Lanai bo tersasap salu darehta, kerna Merga Silima me merganta Kai nge si bahan jadi penggalarna, bekas pemere Taneh Karo enda? Adi erta lenga lit bas kita, mejuah-juah, toto ras pasu-pasu lebe lah gia… Turang , senina, impal kerina, siapai pe biak mergandu Si biak kalimbubu terus ku anak beru, Taneh Karo ndilo tendindu Radu ras kita erdemu, petumbuk ukur gelah sentudu Mari sipesikap kutanta, Taneh Karo, bena taneh, tampuk geluh… // Iklan
