Bilang-bilang Taneh Karo Jahe

Nisuratken: Kempu Raja Lambing Sebayang

Tersinget menda kerna kuta si ndube panteken Merga Silima selenga jadi Karo sirulo bagi sugandari enda. Kerna Taneh Haru ndube panteken kalak merga Karo si lenga Karo-karo si majek binangun sapo mula mula. Tersena menda belangna i waluh desa, kerna Pa Lagan ndube sibayakna. Pasai nari terus ku Melaka ngakuisa. Siak nari ku Pulo Penang nandaisa.

Terbulawan i Sumpah Gajahmada i Kitab Negarakertagama, Raja Cina ras penguasa Persia pernah nurikenca, tersurat kang i kitab kalak Portugis ras kalak Inggris, kerna panteken kalak Haru nina Raja Acih penggelaren man kalak Karo si la erlatih-latih muat nakan panganna. Si mbisa muro musuhna, si mehamat rekalimbubu, meriah resenina, melias metami ranakberu. Pa Timpus si mula-mula[/one_fourth]

Tersinget ka menda kerna kuta Hamparen Perak ndube, taneh panteken Karo-karo mergana. Adi Taneh Langkat Perangin-angin simantekisa. Terus ku Serdang, Sembiring simantekna. Kerna Kuta Medan e, panteken kalak Pelawi jine. Deli ndube kerajanna tergelar Pa Timpus si mula-mula. Pa Derap neruskenca ku empat sukina. Sukapiring Jahe, Milala ndube si mantekisa. Adi Sunggal, enggo tersena kerna kuta kalak Karo si sumbang perjabunna. Kesawan ingan geriten si la ertulan-tulan, Bagepe Labuhen Deli lit nge ndube geriten si la ertakal-takal. Adi Medan Johor ras Tungtungen, e taneh beru Milala ndube man anak beruna si Johor nari. Kerna Brayan, suh ku Belawan, panteken Tarigan mergana. Adi Besitang kuakap Ginting punana. Adi Delitua kalak Karo si madana. Adi Pulo Berhala ndube, Milala si majek lulangna. Pulu Perbesi sempat manteki Padangbulan terus ku Simalingkar. Je ka me sange kalak Pencawan erkuta. Gendek kita ngerana, gedang pe si ban isina, ise si tek adi la si ban buktina? // //