Kolom Nancy M. Brahmana: Mangmang Njujungi Beras

Berita terkini Budaya · 2 Juli 2016

NJUJUNGI BERAS PIHER adalah suatu upacara yang dilakukan kepada seseorang sebagai ucapan syukur dan agar selamat. karena berhasil dalam menjalankan tugas tertentu, menerima seseorang dari tempat jauh, menerima tamu terhormat, dan lain-lain. Contoh sederhana Mangmang Njujungi Beras Piher adalah sebagai berikut:

Emaka ibas wari enda enggo me sue arih ngeranaken gelah me kam jadi sapih-sapihen tergelar kam jadi anak beru kami, Ginting mergana.

Enggo me ijenda pusuh ras ukurndu tading ersada tendi i kutanta enda.

Emaka gundari anak beru kami, pergermetkenlah Katika si mehuli gelah maler asuh-asuhen, gelah reh batang pengkih tunasna.

Bageme bere-bere, gelah Desa Siwaluh tertulih-tulih, terberita si ngian-ngian, gelah ula pera bulung meratah.

Adi gia me pagi kalimbubundu enda, Brahmana mergana lumawang, ula gia tali ni rakut ncalusken bana, gia min ula terbegi persirawaten.

Ibas sekalenda ipetangkuhi me kepe si ermakan.

Emaka ibas kerehendu maka ertambah paguh si ngian kuta, si ni begi kesain, kerangen, lau meciho ras deleng meganjang, meteguh jemakndu peradaten kalak Karo, peradaten si lima ras rakut si telu.

Iamburken me Beras Page Simetunggung enda man bandu:

Sada ninta Dibata kaci-kaci, ersada kerina Tambar Malem ras anak beruna, senina kerina bage pe kalimbubuna, ula sirubat-rubat.

Dua ninta Dibata kaci-kaci ula erdua kata Tambar Malem kerina.

Telu ninta Dibata kaci-kaci, tunda kerina si la mehuli ibas jabu Tambar Malemna e.

Empat ninta Dibata kaci-kaci, selpatken banga kelesa Tambar Malem kerina, bali bas jabu kalimbubu, anak beru kerina; alepken..!

Lima ninta Dibata kaci-kaci, ertima kerina tendinta i rumah. //

Enem ninta Dibata kaci-kaci , teldem kerina si la mehuli ras gerek-gerek si la mehuli.

Pitu ninta Dibata Kaci-kaci, pitut kerina banga kelesa Tambar Malemna kerina ras anak beruna, senina bage pe kalimbubuna.

Waluh ninta Dibata kaci-kaci, erpengaruhlah kam pagi Tambar Malem nandangi kalimbubu ras anak beru bage pe man jelma si enterem enda.

Siwah ninta Dibata kaci-kaci, nilah kerina si la mehuli. Sepuluh ninta Dibata kaci-kaci, bunuh kerina si la mehuli, ukur kalak la mehuli ibas kutanta enda.

Sepuluh sada ninta Dibata kaci-kaci, ersada kerina tendinta i rumah.

Alepken…! Surak…! Dage bagem Tambar Malem , anak beru kami, sibar-sibar e ngenca mangmang ibas njujungi beras, peradaten kalak Karo.

Mejuah-juah kita kerina. // //